إجابات قصيرة لأكثر الأسئلة اللي تجينا. وكل إجابة فيها رابط للتفاصيل لو تبي أكثر.
البروفايل
ليش ما أقدر أنشر أو أعلّق؟
لأن بروفايلك للحين مخفي. كل بروفايل يبدأ مخفي، ولين تنشره ما تقدر تنشر ولا تعلّق ولا تطلق مشاريع. تحتاج اسمك ومسماك ومدينتك، و3 مهارات على الأقل، واكتمال 40%. الخطوات كاملة.
أقدر أغيّر يوزري؟
إيه، من إعدادات الحساب. اليوزر من 2 لين 30 حرف: حروف إنجليزية وأرقام و _ و . بس. ويوزرك القديم يبقى محجوز لك 14 يوم بعد ما تغيّره.
أقدر أخفي بروفايلي بعد ما نشرته؟
إيه، من إعدادات الحساب ("بروفايلك ظاهر"). المخفي ما يشوفه أحد ولا يطلع في البحث، ومحتواك يختفي معه، وما تقدر تنشر أو تعلّق لين ترجع تظهره.
وش أكتب في خانة الاسم؟
اسمك الحقيقي بس. المسمى له خانته، والروابط لها خانتها. إرشادات المجتمع.
التوثيق
وش تعني العلامة جنب الاسم؟
إن صاحب البروفايل وثّق شغله الحالي بإيميل العمل، وشركته لها صفحة في Meetwork. وشعار الشركة يطلع جنب العلامة. كيف توثّق حسابك.
وثّقت شغلي، ليش ما طلعت العلامة؟
غالبًا لأن شركتك ما لها صفحة في Meetwork للحين. تقدر تسويها بنفسك من تحت خبرتك الموثّقة. كيف تسوي صفحة شركتك.
ينفع أوثّق بإيميلي الشخصي؟
لا. لازم إيميل من دومين الشركة نفسها. الإيميلات المجانية والمؤقتة ما تنفع.
إيميل العمل يطلع للناس؟
لا. اللي يبان بس إن خبرتك موثّقة.
الإطلاقات
كم مشروع أقدر أطلق؟
إطلاق واحد بالأسبوع لكل شخص. وتقدر تحجز إطلاقك لين 3 أسابيع قدام.
متى يبدأ أسبوع الإطلاقات؟
منتصف ليل الأحد (UTC+3)، ويخلص آخر السبت.
ليش الأرقام مخفية أول يومين؟
عشان كل المشاريع تاخذ فرصتها تتشاف. أول يومين الترتيب عشوائي والأرقام مخفية، وبعدها يمشي الترتيب بالنقاط. كيف ينحسب الترتيب.
أقدر أصوّت لمشروعي؟
لا. صنّاع المشروع ما يصوّتون له ولا يقيّمونه.
الوظائف
أقدر أنشر وظيفة من بروفايلي؟
لا. الوظائف تنشرها الشركات من صفحاتها، ومشرفين الصفحة بس اللي ينشرون. كيف تنشر وظيفة.
كيف أقدّم على وظيفة؟
من صفحة الوظيفة. إذا التقديم داخل Meetwork، تقدّم ببروفايلك (لازم يكون منشور) وتجاوب على أسئلة الشركة لو فيه. وإذا التقديم من رابط الشركة، تروح لموقعهم.
كيف أعرف وين وصل طلبي؟
من صفحة "طلباتي" في الوظائف. وكل ما تغيّرت حالة طلبك يوصلك إشعار.
أقدر أسحب طلبي؟
إيه، طول ما الشركة ما حسمته (قبول أو رفض). وبعد السحب ما تقدر تقدّم على نفس الوظيفة مرة ثانية.
الخصوصية
أقدر أعرف مين شاف بروفايلي؟
يوصلك إشعار بالمسجّلين اللي شافوا بروفايلك، إلا اللي مفعّل "تصفح بخصوصية".
أقدر أتصفح البروفايلات بدون ما يطلع اسمي؟
إيه. فعّل "تصفح بخصوصية" من إعدادات الحساب، واسمك ما يطلع للناس لما تشوف بروفايلاتهم. وبالمقابل، أنت بعد ما تشوف مين شاف بروفايلك.
أقدر أتحكم وش يوصلني من إشعارات؟
إيه، من إعدادات الإشعارات: التصويتات، والتعليقات، وإعادة النشر، والمتابعين، والإشارات، ومشاهدات البروفايل، وغيرها.
الحساب
كيف أحذف حسابي؟
من إعدادات الحساب، "حذف الحساب". تأكّد بكتابة يوزرك، ورمز يوصلك على إيميلك.
الحذف نهائي: تنحذف منشوراتك وتعليقاتك ومشاريعك ومتابعاتك وصورك، وما نقدر نرجعها.
شفت شي مخالف، وش أسوي؟
بلّغ عنه من زر "⋯" عليه، واختر السبب. صاحب المحتوى ما يعرف مين بلّغ. إرشادات المجتمع.