صفحة الشركة في Meetwork هي البيت الرسمي لشركتك: فيها تعريفها وشعارها، وفريقها الموثّق، ووظائفها المفتوحة. ومنها بس تقدر الشركة تنشر وظائف.
والبروفايل الشخصي ما يمثّل شركة (إرشادات المجتمع)، فالصفحة هي المكان الصح لأي شي باسم الشركة.
مين يقدر يسويها؟
موظف حالي في الشركة، بثلاث شروط:
- بروفايله منشور (الخطوات)
- شغله الحالي في الشركة موثّق بإيميل العمل (كيف توثّق)
- ما يدير صفحة شركة ثانية. كل شخص يدير شركة وحدة بس
والصفحة الوحدة لكل دومين: إذا شركتك لها صفحة من قبل، ما تقدر تسوي ثانية. اطلب من مشرفينها يضيفونك كمشرف.
الخطوات
1. وثّق شغلك
من "السيرة" في الإعدادات، أضف شغلك الحالي ووثّقه بإيميل العمل.
2. أنشئ الصفحة
تحت خبرتك الموثّقة يطلع زر "أنشئ صفحة الشركة". عبّي:
- اسم الشركة: لين 60 حرف
- رابط الصفحة: يصير رابطها في Meetwork (meetwork.app/company/رابطها)، واختاره زين لأنه ما يتغير بعدين
- جملة تعريفية (اختياري)
ودومين إيميلك يصير دومين الشركة، وأنت تصير أول مشرف عليها.
3. كمّل معلوماتها
من إعدادات الصفحة، عدّل:
- الاسم
- الشعار: صورة مربعة، JPG أو PNG أو WebP، لين 2 ميقا
- الجملة التعريفية: لين 100 حرف
- النبذة: لين 1000 حرف
- المدينة والموقع الإلكتروني
الفريق
كل اللي يوثّقون شغلهم الحالي بإيميل من نفس دومين الشركة، يطلعون تلقائيًا في فريقها، وتطلع علامة التوثيق وشعار الشركة جنب أسمائهم.
ومن يخلّص شغله (يحط تاريخ نهاية لخبرته) أو يشيل توثيقه، يطلع من الفريق.
المشرفين
المشرفين هم اللي يعدّلون الصفحة، وينشرون الوظائف، ويديرون المتقدمين.
- إضافة مشرف: من إعدادات الصفحة، "أضف مشرف من الفريق". المشرف لازم يكون موظف موثّق في الشركة، وما يدير صفحة شركة ثانية
- شيل مشرف أو اطلع بنفسك: من نفس المكان. بس الصفحة لازم يبقى لها مشرف واحد على الأقل، فأضف مشرف ثاني قبل لا تطلع
- لما يخلّص المشرف شغله في الشركة، يطيح من الإشراف تلقائيًا. ولو كان آخر مشرف، أقدم موظف موثّق في الشركة (لو فيه) يصير مشرف، عشان الصفحة ما تبقى بدون أحد
بعدها؟
انشر أول وظيفة من صفحة الشركة، وشارك رابط الصفحة مع فريقك عشان يوثّقون وينضمون.