أول ما تسجّل، بروفايلك يبدأ مخفي: ما يشوفه أحد غيرك، وما يطلع في البحث. ولين تنشره، ما تقدر تنشر منشورات ولا تعلّق ولا تطلق مشاريع.
السبب بسيط: نبي كل واحد يتفاعل في المجتمع يكون له بروفايل يعرّف فيه، عشان الناس يعرفون مع مين يتكلمون.
وش لازم عشان تنشر؟
ثلاث شروط:
- اسمك ومسماك ومدينتك
- 3 مهارات على الأقل (والحد 10)
- اكتمال بروفايلك يوصل 40% على الأقل
كيف تنحسب النسبة؟
كل جزء من بروفايلك له وزن:
- الاسم والمسمى والمدينة: 10%
- اليوزر: 5% (يكتمل لحاله لما تختاره)
- المهارات (3 على الأقل): 10%
- صورتك: 5%
- روابطك: 5%
- خبراتك أو تعليمك: 30%
- مشروع أطلقته: 30%
- تفضيلات العمل: 5%
الأساسيات المطلوبة تعطيك 25%. والباقي توصله بأكثر من طريقة: تحط صورتك وروابطك وتفضيلات العمل (15% مع بعض)، أو تضيف خبرة أو تعليم وتوصل على طول.
الخطوات
1. الأساسيات
من الإعدادات، افتح "البروفايل" واكتب اسمك، ومسماك (سطر يوصف وش تسوي، مثل "مطوّرة تطبيقات" أو "مصمم منتجات")، ومدينتك.
حط صورة واضحة لوجهك. الصورة مو شرط للنشر، بس الناس يتفاعلون أكثر مع وجه يعرفونه. ولو تبي تطلق مشروع، الصورة شرط.
2. المهارات
اختر من 3 إلى 10 مهارات تمثل شغلك فعلًا. وتطلع في بروفايلك بأيقوناتها، فاللي يزورك يعرف تخصصك من أول نظرة.
3. الخبرات والتعليم
من "السيرة" في الإعدادات، أضف شغلك الحالي واللي قبله، وتعليمك. هذا الجزء من أكبر الأوزان، لأنه أكثر شي يعرّف الناس فيك.
وإذا أضفت شغلك الحالي، تقدر توثّقه بإيميل العمل ويطلع شعار شركتك جنب اسمك. هنا الطريقة.
4. الروابط وتفضيلات العمل
أضف روابطك (موقعك، حساباتك، أعمالك). وإذا تدوّر شغل، عبّي تفضيلات العمل وفعّل "متاح للعمل".
5. انشر
لما تكمّل الشروط، يتفعّل زر "انشر بروفايلي" في بطاقة اكتمال البروفايل. اضغطه، وبروفايلك يصير ظاهر للكل.
النسبة تطلع لك دايم في بطاقة اكتمال البروفايل، ومعها الخطوة الجاية اللي تقرّبك.
بعد النشر
- تقدر تنشر وتعلّق وتطلق مشاريعك
- بروفايلك يطلع في البحث وفي اقتراحات المتابعة
- تقدر ترجع تخفيه أي وقت من إعدادات الحساب ("بروفايلك ظاهر"). المخفي يختفي هو ومحتواه عن الناس لين ترجع تظهره
كمّل الباقي على راحتك. كل جزء تضيفه يخلي بروفايلك أقوى، ويعطي اللي يزورونك سبب يتابعونك.